រាជធានីភ្នំពេញនៃព្រះរាជាណាចក្រកម្ពុជា និងរដ្ឋធានីប៉េកាំងនៃសាធារណរដ្ឋប្រជាមានិត្យចិនបានសម្រេចចុះហត្ថលេខាលើកិច្ចព្រមព្រៀង ស្តីពីការបង្កើតទីក្រុងសម្ព័ន្ធមេត្រីភាព នៃទីក្រុងទាំង២។ពិធីចុះហត្ថលេខាលើកិច្ចព្រមព្រៀងស្តីពីការបង្កើតទីក្រុងសម្ព័ន្ធមេត្រីរវាងរាជធានីភ្នំពេញ និងរដ្ឋធានីប៉េកាំង បានធ្វើឡើងនៅព្រឹកថ្ងៃទី២១ ខែឧសភា ឆ្នាំ២០១៨នៅសាលារាជធានីភ្នំពេញរវាងឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញនិងលោកស្រី ឈី ជីង សមាជិកគណៈកម្មាធិការ អចិន្រយ្តៃ៍នៃគណៈកម្មាធិការបក្សកុម្មុយនីស្តចិនប្រចាំរដ្ឋធានីប៉េកាំងនិងជា អគ្គនាយកនៃនាយកដ្ឋានរណសិរ្សរួបរួម នៃគណៈកម្មាធិការបក្សកុម្មុយនីស្តចិន ។
នេះជាការបោះជំហានទៅមុខ១ទៀត របស់សាលារាជធានី ភ្នំពេញក្នុងការចាប់ដៃចងសម្ព័ន្ធភាពលើកិច្ចសហប្រតិបត្តិការជាមួយទីក្រុងដ៏ធំរបស់មិត្តចិនហើយ ទីក្រុងប៉េកាំងជាទីក្រុងទី៧របស់ ចិនដែលរាជធានីភ្នំពេញបានចុះ ហត្ថលេខាចងសម្ព័ន្ធមេត្រីដើម្បី គោលបំណងពង្រឹង និងពង្រីកចំណងមិត្តភាព និងកិច្ចសហប្រតិបត្តិការលើការអភិវឌ្ឍន៍ទីក្រុងឱ្យកាន់តែវិវឌ្ឍន៍រីកចំរើនស្របតាម គោលនយោបាយនៃកិច្ចសហប្រតិបត្តិការគ្រប់ជ្រុងជ្រោយដែល ដាក់ចេញដោយប្រមុខ នៃរាជរដ្ឋាភិបាលកម្ពុជាសម្តេចតេជោហ៊ុនសែន និងលោកប្រធានាធិបតីចិនស៊ី ជិនពីង ។
ឯកឧត្តមឃួង ស្រេង បាន ថ្លែងថា “ផ្តើមចេញពីទំនាក់ទំនងការទូតដ៏យូរលង់ ខ្ញុំកត់សំគាល់ថាកិច្ចសហប្រតិបត្តិការទ្វេភាគីរវាងប្រទេសយើងទាំង២កាន់តែមានភាពស៊ីជំរៅស្អិតរមួតលើគ្រប់វិស័យចាប់តាំង ពីកិច្ចសហប្រតិបត្តិការទ្វេភាគីរហូតជាដៃគូយុទ្ធសាស្ត្រគ្រប់ជ្រុងជ្រោយក្នុងឆ្នាំ២០១០ជាពិសេសបន្ទាប់ពីជំនួបថ្នាក់ដឹកនាំកំពូល រវាងសម្តេចតេជោហ៊ុន សែន នាយករដ្ឋមន្ត្រីនៃកម្ពុជានិង លោក ស៊ី ជិនពីង ប្រធានាធិបតីនៃសាធារណៈរដ្ឋប្រជាមានិតចិន”។
ឯកឧត្តមបន្តថា សំរាប់ពិធី ចុះហត្ថលេខាលើកិច្ចព្រមព្រៀងបង្កើតទីក្រុងសម្ពន្ធ័មេត្រីនាពេលនេះ ធ្វើឡើងក្នុងឆ្នាំមិត្តភាពខួបលើកទី៦០នៃទំនាក់ទំនងការទូតកម្ពុជា-ចិនដែលនេះគឺជាព្រឹត្តិការដ៏សំខាន់១ បង្ហាញពីកិច្ចសហប្រតិបត្តិការទាំងក្នុងកម្រិតរដ្ឋបាលថ្នាក់ជាតិ និងថ្នាក់ក្រោមជាតិក្នុងនោះរដ្ឋធានីប៉េកាំងបានក្លាយ ជាទីក្រុងសម្ពន្ធ័មេត្រីទី៧របស់រាជធានីភ្នំពេញក្នុងចំណោមបណ្តាទីក្រុងក្នុងប្រទេសចិនដែលបានចុះហត្ថលេខាចងសម្ពន្ធ័មេត្រីរួចហើយ។
កិច្ចព្រមព្រៀងដែលបានបោះចេញជា៣ភាសារ គឺៈខ្មែរ ចិននិងអង់គ្លេស បានបញ្ជាក់ថាៈភាគី ទាំង២នឹងអនុវត្តនូវគោលការណ៍នៃភាពស្មើគ្នា និងផលប្រយោជន៍ជាទ្វេភាគីតាមរយៈកិច្ចសហប្រតិ-បត្តិការលើវិស័យ១ចំនួនដូចជា ៖សេដ្ឋកិច្ច, វប្បធម៌, អប់រំ,វិទ្យាសាស្ត្រ, បច្ចេកវិទ្យាបរិស្ថាន ជាដើម ។ កិច្ចព្រមព្រៀងនេះមានសុពលភាពរយះពេល៥ឆ្នាំគិតពីថ្ងៃចុះហត្ថលេខាតទៅ ។
លោកស្រីឈី ជីង បានចាត់ ទុកមិត្តភាពកម្ពុជា-ចិនគឺជាមិត្តដ៏ល្អជាដៃគូរួមសុខទុក្ខជាមួយគ្នាជួយគ្នាទៅវិញទៅមកអស់រយៈពេល៦០ឆ្នាំមកហើយ ។
លោកស្រីថ្លែងថា “ទីក្រុង ប៉េកាំងតែងយកចិត្តទុកដាក់ចំពោះរាជធានីភ្នំពេញ ។ ថ្ងៃនេះគឺជាថ្ងៃប្រវត្តិសាស្ត្រដែលទីក្រុងទាំង២(ប៉េកាំង-ភ្នំពេញ) បានចុះហត្ថលេខាចងសម្ពន្ធ័មេត្រីជាមួយគ្នាគឺឈានចូលដល់ដំណាក់កាលអភិវឌ្ឍន៍ផ្លាស់ប្តូរបទពិសោធន៍ក្នុងការអភិវឌ្ឍន៍ទីក្រុង” ៕