ភ្នំពេញ)៖ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានលើកឡើងថា រូបព្រះពុទ្ធបដិមាជាវត្ថុស័ក្កិសិទ្ធិដែលត្រូវគោរព ហើយគួរណាស់តែត្រូវបានក្សាទុកនៅក្នុងសារមន្ទីរ ដោយមិនត្រូវយកទៅតាំងជាគ្រឿងលម្អក្នុងផ្ទះនោះទេ។
លោកជំទាវបានលើកឡើងបែបនេះ នៅក្នុងពិធីប្រគល់-ទទួល រូបព្រះពុទ្ធបដិមា «ព្រះពុទ្ធស្តេចថ្នាំ» ដែលឃ្លាតឆ្ងាយពីកម្ពុជាជិត១០០ឆ្នាំ ហើយត្រូវអនិកជនខ្មែរនៅអាមេរិកនាំមកកាន់កម្ពុជាវិញ នៅរសៀលថ្ងៃទី០៣ ខែមេសានេះ។
រូបព្រះពុទ្ធបដិមា «ព្រះពុទ្ធស្តេចថ្នាំ» មានរចនាបទបាយ័ន នាចុងសតវត្សទី១២ ដើមសតវត្សទី១៣ ធ្វើឡើងពីថ្មភក់ មានកម្ពស់៥០សម និងទទឹង៣៨សម។ រូបបដិមាមួយអង្គនេះ ត្រូវបានអនិជនខ្មែរជាវពីអ្នកថែរក្សានាំយកមកមាតុភូមិកម្ពុជាវិញ បន្ទាប់ពីបានប្រទះឃើញដាក់លក់នៅក្នុងរដ្ឋហាវ៉ៃ សហរដ្ឋអាមេរិក។
រដ្ឋមន្ត្រីក្រសួងវប្បធម៌បញ្ជាក់ថា រូបព្រះពុទ្ធបដិមានេះ នឹងត្រូវរក្សាទុកក្នុងសារមន្ទីរជាតឲ្យបានគង់វង្ស ដើម្បីទុកជាសម្បត្តិវប្បធម៌ជាតិ និងទុកជាទីសក្ការបូជាសម្រាប់កូនចៅខ្មែរជំនាន់នេះ និងជំនាន់ក្រោយ។
ជាមួយគ្នានេះ លោកជំទាវរដ្ឋមន្ត្រី ក៏បានស្នើទៅប្រជាពលរដ្ឋខ្មែររស់នៅក្នុងប្រទេស ឬក្រៅប្រទេសក្តី ប្រសិនបើប្រទះឃើញមានការជួញដូរវត្ថុបុរាណរបស់ជាតិ សូមជូនដំណឹងមកក្រសួងពាក់ព័ន្ធ ដើម្បីមានវិធានការទប់ស្កាត់តាមផ្លូវច្បាប់ នាំយកវត្ថុបុរាណនានាដែលបាត់បង់ត្រឡប់មកកម្ពុជាវិញ។