លោក ញ៉ិប ស្រ៊ន ប្រធានមន្ទីរកសិកម្មរុក្ខាប្រមាញ់ និង នេសាទខេត្តតាកែវ បានឱ្យដឹងនៅថ្ងៃទី២៨ ខែមីនា ឆ្នាំ២០១៧ថា ការងារបង្កបង្កើនផលស្រូវរដូវវស្សា ឆ្នាំ២០១៦-២០១៧ កន្លងទៅ កសិករខេត្តតាកែវ អនុវត្តន៍បាន១៩៧ ៤៣១ហិកតា ស្មើនឹង ១១៦.១៣ភាគរយ នៃផែនការ ក្នុងទិន្នផលមធ្យម ៣.៣២៤ តោន ក្នុងមួយហិកតា ដោយទទួលបានបរិមាណផលសរុបចំនួន ៦៥៦ ២៤៦តោន ។
រីឯស្រូវរដូវប្រាំងគិតមកដល់ថ្ងៃទី២៩ ខែមីនា ឆ្នាំ២០១៧នេះ អនុវត្តន៍បាន៩៨ ៦៧០ហិកតា ស្មើនឹង ១៣១.៥៦ភាគរយនៃផែនការ ក្នុងទិន្នផលមធ្យមប្រមាណ ៤.៨៦១តោន ក្នុងមួយហិកតា ដែល បរិមាណផលសរុបទទួលបានប្រមាណ ៤៧៩ ៦០៦តោន ។
លោក ញ៉ិប ស្រ៊ន បានឱ្យដឹងទៀតថា យោងតាមការធ្វើជំរឿនប្រជាជនឆ្នាំ២០០៨ និង ការធ្វើចំណោល របស់ក្រសួងផែនការឆ្នាំ២០១៤ បានឱ្យដឹងថា ខេត្តតាកែវមានប្រជាជនចំនួន ៩៩១ ៦០៨នាក់ ហើយមនុស្ស ម្នាក់ត្រូវការស្បៀងជាអង្ករក្នុងមួយឆ្នាំចំនួន ១៤៣គីឡូក្រាម ។ ដូច្នេះប្រជាជនទូទាំងខេត្តតាកែវតម្រូវការ ស្បៀងគិតជាអង្កររយៈពេលមួយឆ្នាំប្រមាណ ១៤១ ៨០០តោន ។
ការប៉ាន់ប្រមាណតុល្យភាពស្បៀងដោយដកចេញការហូបចុករយៈពេលមួយឆ្នាំ ការទុកពូជ ចំណីសត្វ ការបាត់បង់ពេលប្រមូលផល ឃើញថា ទូទាំងខេត្តតាកែវ ស្បៀងនៅសល់គិតជាស្រូវចំនួន ៧៦៦៦២៨តោន គិតជាអង្ករចំនួន ៤៩០ ៦៤២តោន សម្រាប់ធ្វើការនាំចេញ ទៅបណ្ដាខេត្តផ្សេងៗនិងក្រៅប្រទេស។ បើប្រៀប ធៀបនឹងឆ្នាំកន្លងទៅ ឆ្នាំនេះសល់ស្បៀងច្រើនជាងឆ្នាំមុន គិតជាស្រូវចំនួន ៦ ៧០០តោន គិតជាអង្ករចំនួន ៤ ២៨៨តោន៕
