ក្រចេះ ៖ ដើម្បីចូលរួមថែរក្សា និងការពារវប្បធម៌ អត្ដសញ្ញាណជាតិឱ្យស្ថិតស្ថេរគង់វង្សនោះ អាជ្ញាធរខេត្ដក្រចេះ បានរៀបចំប្រារព្ធទិវាវប្បធម៌ជាតិ៣មីនា លើកទី១៩ ដែលមានការ អញ្ជើញចូលរួមពីសំណាក់ឯកឧត្តម ជុធ ភឿន រដ្ឋលេខាធិការ ក្រសួងវប្បធម៌និង វិចិត្រសិល្បៈ នាថ្ងៃទី៣០ ខែមីនា ឆ្នាំ២០១៧ នៅខេត្តក្រចេះ។
ឯកឧត្តម ជាក់ ម៉េងហ៊ាង អភិបាលខេត្តស្តីទី ខេត្តក្រចេះ បានលើកឡើងថា រាជរដ្ឋាភិបាលបាន កំណត់ថាវប្បធម៌ជាព្រលឹងជាតិ និងអត្តសញ្ញាណជាតិ ដែល មានតម្លៃមហាសាលមិនអាចកាត់ថ្លៃបាន សម្រាប់ផ្សាភ្ជាប់ទំនាក់ទំនងពីបុគ្គលម្នាក់ទៅ បុគ្គលម្នាក់ពីសហគមន៍មួយទៅ សហគមន៍មួយ សុវត្ថិភាព សុខុដុម ភាពនិងវឌ្ឍនភាពសង្គម។
ឯកឧត្តមបានបន្ដថា វប្បធម៌ក៏បានដើរតួនាទីជាប្រភពធនធានដ៏មានសក្តានុពល ដែលមិនចេះរីងស្ងួត សម្រាប់បម្រើឱ្យការអភិវឌ្ឍសេដ្ឋកិច្ចប្រកបដោយនិរន្តរភាព។
ឯកឧត្តម ជុច ភឿន រដ្ឋលេខាធិការ ក្រសួងវប្បធម៌និងវិចិត្រសិល្បៈ បានមានប្រសាសន៍ថា ក្នុងរយៈពេលបីឆ្នាំហើយដែលរាជរដ្ឋាភិបាលបានកំណត់យក ប្រធានបទតែមួយដាក់ចូលការប្រារព្ធ ទិវាវប្បធម៌ជាតិ៣មីនា គឺ “ យុវជនដើម្បីវប្បធម៌ជាតិ “ ដើម្បីពញ្ញាក់ស្មារតីយុវជន ឱ្យចូលរួមសម្រេច ឱ្យបានគោលបំណងសំខាន់ៗ ដូចជា ការបង្កើនការស្រឡាញ់ និងមានស្មារតីក្នុងការផ្ទេរ និងទទួលយក នូវចំណេះដឹងជំនាញ បច្ចេកទេសសិល្បៈវប្បធម៌ ការលើកកម្ពស់ការយល់ដឹងអំពីតម្លៃពិតនៃវប្បធម៌ បង្កើនការចូលរួមឱ្យកាន់តែខ្លាំង ក្នុងការស្រាវជ្រាវនិងចងក្រងរក្សាទុកឱ្យបានគង់វង្ស។
ឯកឧត្តមបានបញ្ជាក់ថា នេះគឺជាឯកសារបេតិកភណ្ឌវប្បធម៌គ្រប់ប្រភេទ លើកស្ទួយការប្រើប្រាស់ សក្តានុពលវប្បធម៌ បង្កើតស្នាដៃវប្បធម៌ថ្មីៗ ជំរុញការចូលរួមកាន់តែសកម្មប្រកបដោយមោទនភាព និងការទទួលខុសត្រូវខ្ពស់ ក្នុងផ្សព្វផ្សាយអភិរក្ស និងអភិវឌ្ឍន៍វប្បធម៌ ព្រមទាំងវប្បធម៌ចម្រុះ ប្រកបដោយនិរន្តរភាព៕
