នៅថ្ងៃទី២២ខែឧសភា ឆ្នាំ ២០១៨ វេលាម៉ោង១១ៈ០០ព្រឹកនេះ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តម៉ាក់ដេវូ ពណ៌ត្រូយចេកស្លាកលេខ ៣ឌ-២០៥៦បុកជា មួយរថយន្ត កាមរីបាឡែនស្លាក លេខ ២ទ-២៥៣៤ពណ៌ទឹកប្រាក់ ក្នុងទិសដៅបញ្ច្រាសទិសគ្នា។
ករណីគ្រោះថ្នាក់ចរាចរណ៍ខាងលើនេះ បានកើតឡើងនៅលើផ្លូវជាតិ៤ មុខរោងចក្រមួយកន្លែង ស្ថិតនៅភូមិត្រពាំងគារឃុំជើងគោ ស្រុកព្រៃនប់ ខេត្តព្រះសីហនុ បណ្តាលឱ្យស្លាប់មន្ត្រីគយប្រចាំការកែវផុសម្នាក់និងមេបញ្ជាការរងកងរាជអាវុធហត្ថស្រុកព្រៃនប់ម្នាក់ផងដែរ។
មន្ត្រីគយប្រចាំការកែវផុសដែលបានស្លាប់ឈ្មោះ ញេប នៅនិងមេបញ្ជាការរងកងរាជអាវុធហត្ថ ស្រុកព្រៃកនប់ គឺលោកអនុសេនីយ៍ឯក ឆេង សុខនី។
លោកឧត្តមសេនីយ៍ទោជួន ណារិន្ទ ស្នងការនគរបាលខេត្តព្រះសីហនុ បានបញ្ជាក់ប្រាប់ថានៅមុនកើតហេតុមន្ត្រីអាវុធហត្ថដែលជាមេបញ្ជាការរងអាវុធហត្ថស្រុកព្រៃនប់ ជាអ្នកបើករថយន្តជូនមន្ត្រីគយ ដើម្បីយកលុយទៅដាក់នៅរតនាគារជាតិ នារាជធានីភ្នំពេញមិនទាន់ទៅដល់គោលដៅផង ស្រាប់តែជួបគ្រោះថ្នាក់ចរាចរណ៍ ដោយបុកជាមួយរថយន្តធុនធំបណ្តាលរថយន្តកាមរីខូចខាតផ្នែកខាងមុខស្ទើរទាំង ស្រុង ហើយមន្ត្រីគយស្លាប់នៅ នឹងកន្លែង ខណៈមន្ត្រីអាវុធហត្ថស្លាប់ពេលបញ្ជូនទៅមន្ទីរពេទ្យ។
លោកឧត្តមសេនីយ៍ស្នងការបញ្ជាក់ថា ករណីនេះ កម្លាំងសមត្ថកិច្ចបានការពារលុយដែល ត្រូវដឹកទៅទុកនៅរតនាគារជាតិមិនឱ្យមានការបាត់បង់ឡើយ ៕
